ఇన్‌ఫార్మర్‌కు మరణశిక్ష విధించాం: మావోయిస్టులు

ఈనాడు, హైదరాబాద్‌: భద్రతా బలగాలు వైమానిక దాడులు జరపడానికి కారణమైన ఇన్‌ఫార్మర్‌ తాటి హిడ్మాకు మరణశిక్ష విధించినట్లు మావోయిస్టు పార్టీ ప్రకటించింది. ఈ మేరకు ఛత్తీస్‌గఢ్‌ రాష్ట్రం దక్షిణ బస్తర్‌ డివిజనల్‌ కమిటీ కార్యదర్శి గంగ పేరుతో బుధవారం ఒక ప్రకటన విడుదలైంది. హిడ్మా మరణానికి పోలీసులు, కేంద్ర, రాష్ట్ర ప్రభుత్వాలదే బాధ్యత అని ఆ ప్రకటనలో స్పష్టం చేశారు. విప్లవోద్యమాన్ని నిర్మూలించే లక్ష్యంతో కేంద్ర హోంమంత్రి అమిత్‌షా ఆదేశాల మేరకు భద్రతా బలగాలు ఈ నెల 11వ తేదీ పామేడు-తెలంగాణ సరిహద్దుల్లో తమ పార్టీ నాయకత్వం, ప్రజలు, పీఎల్‌జీఏ దళాలపై డ్రోన్లు, హెలికాప్టర్లతో దాడి చేశారని ఈ ప్రకటనలో వివరించారు. దంతెవాడ బొట్టెలోగ్‌ గ్రామానికి చెందిన తాటి హిడ్మా ఇచ్చిన సమాచారంతోనే ఈ దాడి జరిగిందన్నారు. మావోయిస్టు పార్టీని దెబ్బతీసే ఉద్దేశంతో పోలీసులు ఇన్ఫార్మర్‌ వ్యవస్థను ప్రోత్సహిస్తున్నారని ఆ ప్రకటనలో ఆరోపించారు.