డివైడర్‌ను ఢీకొన్న కారు...ఐదుగురి దుర్మరణం

చంద్రగిరి, న్యూస్‌టుడే: తిరుపతి జిల్లా చంద్రగిరి మండలంలో జరిగిన ఘోర రోడ్డు ప్రమాదంలో మహారాష్ట్రకు చెందిన ఐదుగురు భక్తులు మృతి చెందారు. పుణ్యక్షేత్రాల దర్శనార్థం సోలాపూర్‌ నుంచి 9 మంది మిత్రబృందం తిరుమల వచ్చింది. శ్రీవారిని దర్శించుకున్నాక... బుధవారం మధ్యాహ్నం కాణిపాకం వెళ్తుండగా వీరు ప్రయాణిస్తున్న కారు మండలంలోని కల్‌రోడ్డుపల్లి జాతీయ మార్గంలో కల్వర్టును వేగంగా ఢీకొంది. ఈ ఘటనలో వాహనం సగభాగం వరకు దెబ్బతింది. అత్తర్‌ అనంత్‌ తెంబునీకర్‌ (20), మయూర దయానంద్‌ మత్‌పతి (28), రిషికేష్‌ మధుసూదన్‌ జంగం (32), అజయ్‌ నంగనాథ్‌ లుత్తే (31) దుర్మరణం చెందారు. రుయా ఆసుపత్రిలో చికిత్స పొందుతూ అంబదాస్‌ కుమార్‌ (32) చనిపోయారు. మరో నలుగురు తీవ్రగాయాలతో రుయా ఆసుపత్రిలో వైద్యసేవలు పొందుతున్నారని పోలీసులు తెలిపారు.