సంక్షిప్త వార్తలు(2)

గణతంత్ర దినోత్సవం రోజున బాలికపై సామూహిక అత్యాచారం

గణతంత్ర దినోత్సవం రోజున 14 ఏళ్ల విద్యార్థినిపై కొందరు దుండగులు సామూహిక అత్యాచారం చేశారు. ఈ దారుణ ఘటన బిహార్‌లోని బక్సర్‌ జిల్లాలో చోటుచేసుకుంది. పోలీసులు తెలిపిన వివరాల ప్రకారం.. బాధిత బాలిక పాఠశాలకు వెళ్తుండగా దుండగులు ఆమెను ఎత్తుకెళ్లారు. శివారులోని ఓ గదిలోకి తీసుకెళ్లి ఆమెపై అత్యాచారానికి పాల్పడ్డారు. అనంతరం అక్కడి నుంచి పరారయ్యారు. బాలిక ఇంటికి చేరుకుని.. జరిగిన విషయాన్ని కుటుంబ సభ్యులకు తెలిపింది. వారి ఫిర్యాదు మేరకు ముగ్గురు నిందితులను అదుపులోకి తీసుకున్నట్లు పోలీసులు తెలిపారు.

ఆరో అంతస్తు నుంచి శునకం విసిరివేత

ఇందౌర్‌: గుర్తు తెలియని వ్యక్తులు ఓ శునకాన్ని ఆరో అంతస్తు నుంచి విసిరివేయడంతో తీవ్రగాయాలతో ప్రాణాలు కోల్పోయింది. ఈ అమానవీయ ఘటన మధ్యప్రదేశ్‌లోని ఇందౌర్‌లో జరిగింది. ఇక్కడి రాయల్‌ అమర్‌ గ్రీన్‌ అపార్టుమెంటు నుంచి నిందితులు శునకాన్ని విసిరివేశారు. స్థానిక జంతు ప్రేమికుడొకరు ఇచ్చిన ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.