ధన్‌బాద్‌లోని నర్సింగ్‌ హోంలో అగ్నిప్రమాదం

ఐదుగురి మృతి

ధన్‌బాద్‌: ఝార్ఖండ్‌లోని ఓ నర్సింగ్‌ హోంలో అగ్నిప్రమాదం సంభవించి వైద్య దంపతులు సహా కనీసం ఐదుగురు మరణించారు. ధన్‌బాద్‌ నగరంలో శనివారం ఈ దుర్ఘటన జరిగింది. డాక్టర్‌ వికాస్‌ హాజ్రా, అతడి భార్య ప్రేమ హాజ్రా అనే దంపతులు నిర్వహిస్తున్న ఆ నర్సింగ్‌ హోంలోనే వారి నివాస గృహమూ ఉంది. శనివారం తెల్లవారుజామున ఇక్కడ అగ్నిప్రమాదం జరిగిందని సమాచారం అందుకున్న సిబ్బంది ఘటనా స్థలానికి చేరుకుని మంటలను అదుపులోకి తీసుకొచ్చారు. వైద్య దంపతులు, వారి మేనల్లుడు, పనిమనిషి మృతదేహాలను గుర్తించగా మరొక మృతదేహం గురించి తెలియాల్సి ఉంది. గాయాలపాలైన ఓ వ్యక్తిని ఆస్పత్రికి తరలించారు. స్టోర్‌ రూంలో ఎగసిన మంటల వల్ల ఊపిరాడక వీరు మరణించి ఉంటారని ఉన్నతాధికారి ఒకరు తెలిపారు. ప్రమాదంలో వైద్యుల పెంపుడు శునకమూ ప్రాణాలు కోల్పోయింది.