గంజాయి గ్యాంగ్‌ ఆగడాలను భరించలేకపోతున్నాం

తాడేపల్లి స్టేషన్‌కు వచ్చిన లంబాడీపేట మహిళలు
సీఎం ఇంటి సమీపంలో దుస్థితిపై ఆవేదన

ఈనాడు-అమరావతి, న్యూస్‌టుడే-తాడేపల్లి: ‘ముఖ్యమంత్రి నివాసం ఉండే తాడేపల్లిలో గంజాయి బ్యాచ్‌ల ఆగడాలకు అడ్డూ అదుపూ లేకుండా పోతోంది. వారితో మాకు నిద్రాహారాలు ఉండటం లేదు. ప్రాణాలు గుప్పిట్లో పెట్టుకుని బతుకుతున్నాం’ అని లంబాడీపేట మహిళలు మంగళవారం తాడేపల్లి స్టేషన్‌ తలుపుట్టారు. సీఎం నివాసానికి అర కిలోమీటరు దూరంలోనే లంబాడీపేట ఉంటుంది. రెండురోజుల క్రితం ఇంట్లో ఉన్న బాలుడిని తీసుకెళ్లి గంజాయి బ్యాచ్‌ బీరు సీసాతో తీవ్రంగా దాడిచేసి గాయపరిచిందని, ప్రస్తుతం చావుబతుకుల మధ్య కొట్టుమిట్టాడుతున్నాడని, ఇలాంటివి తరచూ జరుగుతూనే ఉన్నా పోలీసులు పట్టించుకోవటం లేదని మహిళలు స్టేషన్‌ వద్దకు వచ్చి ఆందోళన వ్యక్తం చేశారు. ముఖ్యమంత్రి నివాసానికి కూతవేటు దూరంలో ఉండే కృష్ణా కెనాల్‌ జంక్షన్‌ యార్డులను అడ్డాగా చేసుకుని గంజాయి గ్యాంగులు చెలరేగుతున్నాయని వారు తెలిపారు. సాయిబాబా మందిరం వద్ద నుంచి ముగ్గురోడ్డు వరకు వీరి ఆగడాలు, అకృత్యాలు పోలీసులకు పట్టడం లేదన్నారు. కొద్దిరోజుల క్రితం ఓ హోంగార్డును రక్తం చిందేలా గాయపరిచారని, ద్విచక్ర వాహనంపై వెళుతున్న తండ్రీకుమార్తెలపై దాడికి తెగబడ్డారని, తాజాగా తమ కాలనీకి చెందిన ఓ యువకుడిని బీరుబాటిళ్లతో పొడవడంతో వారి ఆగడాలను భరించలేక స్టేషన్‌కు రావాల్సి వచ్చిందని వారు వివరించారు.