లారీతో తొక్కించి.. తండ్రిని హతమార్చి

మర్రిపాడు, న్యూస్‌టుడే: కన్నతండ్రినే లారీతో తొక్కించి హతమార్చాడొక కొడుకు. ఈ దారుణ ఘటన శ్రీపొట్టి శ్రీరాములు నెల్లూరు జిల్లా మర్రిపాడు మండలం రాజుపాళెం వద్ద బుధవారం జరిగింది. కడప జిల్లా ముద్దనూరు మండలం కొర్రపాడుకు చెందిన మహబూబ్‌ బాషా (52), షఫీ తండ్రీకొడుకులు. వీరు తాడిపత్రి నుంచి సిమెంటు లోడుతో లారీలో నెల్లూరుకు బయలుదేరారు. వీరితోపాటు మరో డ్రైవర్‌ ఓబయ్య ఉన్నాడు. కుటుంబ కలహాలతో తండ్రీకొడుకులు గొడవ పడుతుండగా విసుగెత్తిపోయిన ఓబయ్య రాజుపాళెం వద్ద లారీని ఆపేసి వెళ్లిపోయాడు. ఈ క్రమంలో వారి మధ్య వివాదం మరింత ముదిరింది. షఫీ లారీ ఎక్కి ముందుకు కదిలించబోతుండగా తండ్రి బాషా అడ్డుగా నిల్చున్నాడు. కోపంతో ఉన్న షఫీ లారీతో అతడిని ఢీకొట్టడంతో అక్కడికక్కడే ప్రాణాలొదిలాడు. పోలీసులు నిందితుడి కోసం గాలిస్తున్నారు.