Andhra News: విజయవాడలో విషాదం.. వాటర్‌ హీటర్‌ తగిలి తండ్రి, కుమార్తె మృతి

విజయవాడ: విద్యుదాఘాతంతో తండ్రి, కుమార్తె మృతిచెందిన విషాద ఘటన విజయవాడలో చోటు చేసుకుంది. పోలీసుల కథనం ప్రకారం.. సత్యనారాయణపురంలోని రామానగర్‌లో ఇప్పిలి సింహాచలం, అతని కుమార్తె పసుపులేటి మంగమ్మ, ఆమె భర్త గోపినాథ్‌ నివాసముంటున్నారు. నీళ్లు వేడి చేసేందుకు ఉపయోగించే హీటర్‌ తాకడంతో  సింహాచలం, మంగమ్మ తీవ్రంగా గాయపడ్డారు. పక్కనే నివాసముంటున్న లక్కవరపు సీత వీరిని కాపాడేందుకు ప్రయత్నించి ఆమె కూడా స్వల్పంగా గాయపడింది. క్షతగాత్రులను ప్రభుత్వాసుపత్రికి తరలించగా.. సింహాచలం, మంగమ్మ మృతి చెందినట్టు వైద్యులు ధ్రువీకరించారు. ఘటనపై పోలీసులు కేసు నమోదు చేసి దర్యాప్తు చేస్తున్నారు. విద్యుదాఘాతంతో తండ్రి, కుమార్తె మృతి చెందడంతో రామానగర్‌లో విషాదఛాయలు అలముకున్నాయి.