విలేకరిపై కాల్పులు... ఆసుపత్రికి తరలింపు

రాయచోటి, న్యూస్‌టుడే: అన్నమయ్య జిల్లా రాయచోటి శివాలయం కూడలి వద్ద ఓ టీవీ ఛానల్‌ విలేకరిపై గుర్తుతెలియని వ్యక్తులు కాల్పులు జరిపారు. ఈ ఘటన ఆలస్యంగా వెలుగుచూసింది. పీలేరులో పనిచేస్తున్న పర్వతరెడ్డి (45) గత నెల 31 సాయంత్రం 5.30కు చిత్తూరు రింగ్‌రోడ్డు నుంచి బయలుదేరి రాయచోటికి ద్విచక్ర వాహనంపై వెళ్తుండగా శివాలయం కూడలి వద్దకు రాగానే గుర్తుతెలియని వ్యక్తి కాల్పులు జరపడంతో గాయపడినట్లు పట్టణ సీఐ సుధాకర్‌రెడ్డి పేర్కొన్నారు. వాహనాల టైర్ల కిందినుంచి రాయి వచ్చి తగిలిందని భావించి కడపలోని ఓ ప్రైవేటు ఆసుపత్రికి వెళ్లి చికిత్స పొందారన్నారు. వైద్యులు శరీరంలో బుల్లెట్‌ ఉన్నట్లు గుర్తించి, వేలూరు సీఎంసీ ఆసుపత్రికి తరలించడంతో అక్కడి వైద్యులు శస్త్రచికిత్స ద్వారా బుల్లెట్‌ను వెలికి తీశారన్నారు. ఫిర్యాదు మేరకు కేసు నమోదుచేసి. కాల్పులు జరిపినవారి కోసం గాలిస్తున్నామని సీఐ పేర్కొన్నారు. క్షతగాత్రుడికి, వారి బంధువులకు మధ్య ఆస్తి తగాదాలు ఉన్నట్లు గుర్తించినట్లు తెలిపారు.