అప్పుల బాధతో కౌలు రైతు ఆత్మహత్య

కనగాలవారిపాలెం (మేదరమెట్ల), న్యూస్‌టుడే: సాగు కోసం చేసిన రుణాన్ని తీర్చేదారి లేక కౌలు రైతు ఆత్మహత్య చేసుకున్న సంఘటన బాపట్ల జిల్లా కొరిశపాడు మండలం పమిడిపాడు పంచాయతీ పరిధిలోని కనగాలవారిపాలెంలో ఆదివారం చోటుచేసుకుంది. ఎస్సై వెంకటేశ్వర్లు తెలిపిన వివరాల ప్రకారం.. కనగాలవారిపాలెం గ్రామానికి చెందిన కనగాల శ్రీనివాసరావు(56)కు గ్రామంలో రెండెకరాల పొలం ఉంది. గత ఏడాది ప్రకాశం జిల్లా కొండపి నియోజకవర్గంలో రెండు వందల ఎకరాలు కౌలుకు తీసుకుని శనగ వేశారు. ఈ ఏడాది గ్రామంలో 14 ఎకరాలు కౌలుకు తీసుకుని మిరప సాగు చేశారు. శనగలో నష్టం రాగా ప్రస్తుతం మిరప దెబ్బతింది. సాగు కోసం సుమారు రూ.70 లక్షల వరకు అప్పు చేశారు. కొద్దిరోజుల క్రితం ఎకరం పొలం అమ్మి కొంతమేర అప్పులు తీర్చినట్లు సన్నిహితులు తెలిపారని ఎస్సై చెప్పారు. మిగిలిన అప్పులు తీర్చే మార్గం కనిపించక ఇంటి వద్దనే పురుగు మందు తాగాడు. అపస్మారక స్థితిలో ఉన్న అతడ్ని కుటుంబ సభ్యులు ఆసుపత్రికి తరలించగా అప్పటికే మృతిచెందాడు.