రహదారిపై 20 కిలోల మందుపాతర గుర్తింపు

పేల్చివేసిన బాంబ్‌ స్క్వాడ్‌.. తప్పిన ముప్పు
మావోయిస్టుల కుట్ర భగ్నం

చర్ల, న్యూస్‌టుడే: ఛత్తీస్‌గఢ్‌-తెలంగాణ సరిహద్దులో భద్రాద్రి కొత్తగూడెం జిల్లా చర్ల మండలంలోని ఓ రహదారిపై మావోయిస్టులు అమర్చిన మందుపాతరను పోలీసులు గుర్తించి ఆదివారం పేల్చేశారు. దీంతో పెద్దముప్పు తప్పినట్లయింది. సీఐ అశోక్‌ తెలిపిన వివరాల ప్రకారం.. బోదనెల్లి-ఎర్రబోరు రహదారిలో చర్ల పోలీసులు, ప్రత్యేక, సీఆర్పీఎఫ్‌ బలగాలు, బాంబ్‌ స్క్వాడ్‌ బృందం శనివారం తనిఖీలు చేపట్టాయి. ఈ క్రమంలో రహదారిపై మావోయిస్టులు అమర్చిన 20 కిలోల భారీ మందుపాతరను గుర్తించాయి. ఆదివారం బాంబ్‌ స్క్వాడ్‌ బృందం ఆ మందుపాతరను పేల్చివేసి మావోయిస్టుల కుట్రను భగ్నం చేసింది. దీన్ని గుర్తించకుంటే భారీ నష్టం జరిగేదని సీఐ పేర్కొన్నారు. మావోయిస్టులు ప్రజల ప్రాణాలతో చెలగాటమాడుతున్నారని ఆగ్రహం వ్యక్తం చేశారు.