అప్పుల బాధతో అన్నదాత బలవన్మరణం

అచ్చంపేట న్యూటౌన్‌, న్యూస్‌టుడే: పంట దిగుబడి ఆశించిన విధంగా రాకపోవడంతో అప్పులు ఎలా తీర్చాలనే బాధతో ఓ అన్నదాత బలవన్మరణానికి పాల్పడ్డారు. ఈ సంఘటన నాగర్‌కర్నూల్‌ జిల్లా అచ్చంపేట మండలం నడింపల్లి శివారులో చోటు చేసుకుంది. పోలీసులు తెలిపిన వివరాల ప్రకారం.. లింగోటం గ్రామానికి చెందిన లింగం(32) తనకున్న రెండెకరాల్లో గత ఏడాది పత్తి సాగు చేయగా వర్షాల వల్ల పంట దెబ్బతింది. ఈ ఏడాది వేరుసెనగ పంట సాగు చేశారు. ఈ పంటల పెట్టుబడి కోసం రూ.2 లక్షల వరకు అప్పు చేశారు. దిగుబడి ఏ మాత్రం రాకపోవడంతో కొన్ని రోజులుగా దిగాలుగా ఉంటున్నారు. ఈ క్రమంలోనే అప్పులు ఎలా తీర్చాలనే బెంగతో ఆదివారం నడింపల్లి చెరువు సమీపంలో పురుగు మందు తాగి ఆత్మహత్యకు పాల్పడ్డారు. కుటుంబ సభ్యుల ఫిర్యాదుతో కేసు నమోదు చేసి దర్యాప్తు చేపట్టినట్లు ఎస్సై గోవర్ధన్‌ తెలిపారు.