బాలికలపై అత్యాచారం కేసులో.. యువకుడికి జీవిత ఖైదు

పార్వతీపురం పట్టణం, న్యూస్‌టుడే: ఇద్దరు బాలికలపై అత్యాచారానికి పాల్పడిన యువకుడికి జీవిత ఖైదు విధిస్తూ విజయనగరం జిల్లా ఎస్సీ, ఎస్టీ, పోక్సో ప్రత్యేక న్యాయస్థానం తీర్పు ఇచ్చింది. దీనికి సంబంధించిన వివరాలను పార్వతీపురం మన్యం జిల్లా ఎస్పీ విద్యాసాగర్‌నాయుడు మంగళవారం వెల్లడించారు. గతేడాది జనవరిలో కురుపాం మండలం రావాడలోని జలాశయం వద్దకు ఇద్దరు బాలికలు తమ స్నేహితులను కలిసేందుకు వెళ్లారు. తిరిగి వస్తుండగా జియ్యమ్మవలస మండలంలోని చినమేరంగికి చెందిన వెలగాడ రాంబాబు(33) వారిని అడ్డుకొని బెదిరించాడు. సమీపంలోని ఆయిల్‌పాం తోటలోకి తీసుకెళ్లి అత్యాచారానికి పాల్పడ్డాడు. నిందితుడిని పోలీసులు అరెస్టు చేసి కోర్టులో ప్రవేశపెట్టారు. అతనికి జీవిత ఖైదుతో పాటు రూ.24,500 జరిమానా విధిస్తూ న్యాయమూర్తి షేక్‌ సికిందర్‌ బాషా మంగళవారం తీర్పు వెలువరించారు. బాధిత బాలికలకు రూ.5లక్షల చొప్పున పరిహారం చెల్లించాలని తీర్పులో పేర్కొన్నట్లు ఎస్పీ తెలిపారు.