గంజాయి మత్తులో బాలికపై బ్లేడుతో దాడి

కావలి, న్యూస్‌టుడే: గంజాయి మత్తులో ఓ యువకుడు దారినపోయే బాలిక గొంతు కోసిన ఉదంతమిది. శ్రీపొట్టిశ్రీరాములు నెల్లూరు జిల్లా కావలి పట్టణంలో గురువారం జరిగిన దారుణమిది. వెంగళరావునగర్‌లోని పొట్టిశ్రీరాములు పురపాలక పాఠశాలలో చోడ హవ్యశ్రీప్రియ (8) రెండో తరగతి చదువుతుంది. అదే ప్రాంతానికి చెందిన షేక్‌ ఖాదర్‌బాషా గంజాయికి బానిసయ్యాడు. గురువారం సాయంత్రం పాఠశాల నుంచి ఇంటికి వస్తున్న బాలికపై గంజాయి మత్తులో బ్లేడ్‌తో దాడిచేశాడు. గొంతుపై కొంతభాగం తెగింది. చిన్నారి పరుగున ఇంటికి చేరుకుంది. యువకుడు కూడా వాళ్లింటికి వచ్చి, గొంతు కోసింది తానేనని చెబుతూ వీరంగంవేశాడు బాలికను ప్రైవేట్‌ ఆస్పత్రికి తరలించి చికిత్స అందించారు. బాలిక తల్లిదండ్రుల ఫిర్యాదు మేరకు ఖాదర్‌బాషాతో పాటు అతని తల్లిదండ్రులను విచారిస్తున్నట్లు కావలి సీఐ కె.శ్రీనివాస్‌ తెలిపారు.