జనజాగరణ సమితి రాష్ట్ర కన్వీనర్‌ వాసు లొంగుబాటు

విశాఖపట్నం (ఎం.వి.పి.కాలనీ), న్యూస్‌టుడే: ఆంధ్ర విశ్వవిద్యాలయం ప్రధాన ద్వారం వద్ద ‘సీఎం గోబ్యాక్‌, బిల్ట్ అమరావతి’ పేరిట ఫ్లెక్సీలను ఏర్పాటుచేసిన జనజాగరణ సమితి రాష్ట్ర కన్వీనర్‌ వాసు శనివారం విశాఖ మూడో పట్టణ పోలీసుస్టేషన్‌లో లొంగిపోయారు. ఈనెల 16న వాసు నేతృత్వంలో ఏయూ ప్రధాన ద్వారం వద్ద ముఖ్యమంత్రికి వ్యతిరేకంగా ఫ్లెక్సీలు ఏర్పాటు చేయడంపై వర్సిటీ భద్రతా సిబ్బంది ఇచ్చిన ఫిర్యాదు మేరకు మూడో పట్టణ పోలీసుస్టేషన్‌లో కేసు నమోదైంది. అనంతరం వాసు కోసం పోలీసులు గాలించి సమితి కార్యకర్తలను అదుపులోకి తీసుకుని ప్రశ్నించారు. అయితే వాసు శనివారం సాయంత్రం నేరుగా పోలీసుస్టేషన్‌కు వచ్చారు. ఆయన్నుంచి పోలీసులు వివరాలు సేకరిస్తున్నారు.