బాలికపై వాలంటీరు అత్యాచారయత్నం

నాగలాపురం, న్యూస్‌టుడే: బాలికపై గ్రామ సచివాలయ వాలంటీరు అత్యాచారయత్నం చేసిన సంఘటన తిరుపతి జిల్లా నాగలాపురం మండలంలో ఆదివారం చోటు చేసుకుంది. ఎస్సై హనుమంతప్ప కథనం మేరకు.. మండలంలోని ఒక గ్రామ వాలంటీరు ఆదివారం మధ్యాహ్నం మద్యం మత్తులో గ్రామానికి చెందిన తొమ్మిదో తరగతి బాలిక (14) ఇంటికి వెళ్లాడు. ఒంటరిగా ఉండటంతో ఆమెపై అత్యాచారయత్నానికి పాల్పడ్డాడు. బాలిక ప్రతిఘటించడంతో పారిపోయాడు. విషయాన్ని బాలిక తల్లికి తెలిపింది. తల్లి ఫిర్యాదు మేరకు పోక్సో కేసు నమోదు చేసినట్లు ఎస్సై తెలిపారు. బాలికకు వైద్య పరీక్షలు చేయించి కేసు దర్యాప్తు చేస్తున్నామన్నారు.