క్యూ న్యూస్‌ కార్యాలయంపై దాడి

కంప్యూటర్లు, ఫర్నిచర్‌ ధ్వంసం

మేడిపల్లి(బోడుప్పల్‌) న్యూస్‌టుడే: తీన్మార్‌ మల్లన్న అలియాస్‌ చింతపండు నవీన్‌ ఆధ్వర్యంలో హైదరాబాద్‌ బోడుప్పల్‌లో నడుస్తున్న క్యూ న్యూస్‌ కార్యాలయంపై గుర్తుతెలియని వ్యక్తులు ఆదివారం దాడిచేశారు. కార్యాలయం అద్దాలు, కంప్యూటర్లు, ఫర్నిచర్‌ను ధ్వంసం చేశారు. ‘‘మీ ఇష్టం వచ్చినట్లుగా వీడియోల్లో చూపిస్తారా..’’ అంటూ 15-20 మంది వచ్చి విధ్వంసం సృష్టించారని సిబ్బంది తెలిపారు. అడ్డుకోబోయిన తమపై దాడి చేశారని, ఒకర్ని పట్టుకొని పోలీసులకు అప్పగించామన్నారు. ఘటనపై క్యూన్యూస్‌ కోఆర్డినేటర్‌ సుదర్శన్‌ పోలీసులకు ఫిర్యాదు చేశారు. భారాస పార్టీ వారే దాడికి పాల్పడ్డారని ఆరోపించారు.