రజనీకాంత్‌ కుమార్తె ఇంట్లో చోరీ

60 సవర్ల నగలు కనిపించలేదని ఐశ్వర్య ఫిర్యాదు

చెన్నై (ప్యారిస్‌), న్యూస్‌టుడే: అగ్రనటుడు రజనీకాంత్‌ పెద్ద కుమార్తె, దర్శకురాలు ఐశ్వర్య నివాసంలో భారీ చోరీ జరిగింది. 60 సవర్ల బంగారం, వజ్రాభరణాలు చోరీకి గురయ్యాయంటూ ఆమె పోలీసులకు ఫిర్యాదు చేశారు. ఫిబ్రవరిలో చేసిన ఈ ఫిర్యాదు ఆలస్యంగా వెలుగులోకి వచ్చింది. నాలుగేళ్ల క్రితం తన సోదరి వివాహంలో ఆ ఆభరణాలను ధరించానని, ఆ తర్వాత వాటిని ఇంట్లోనే లాకర్‌లో భద్రపరిచానని, అప్పటి నుంచి దాన్ని మళ్లీ తెరిచి చూడలేదని ఆమె పేర్కొన్నారు. ఫిబ్రవరి 10న లాకర్‌ తెరిచి చూడగా.. ఆభరణాలు కనిపించలేదని తెలిపారు. ఇంట్లో పనిచేస్తున్న ముగ్గురు వ్యక్తులపై అనుమానం ఉన్నట్లు వివరించారు.