తెగిపడిన విద్యుత్తు తీగ.. షాక్‌తో కౌలు రైతు మృతి

పెంటపాడు, న్యూస్‌టుడే: పేద కౌలు రైతును విద్యుత్తు తీగ రూపంలో విధి బలి తీసుకుంది. ఏపీలోని పశ్చిమ గోదావరి జిల్లా పెంటపాడులో ఈ విషాద ఘటన చోటుచేసుకుంది. పెంటపాడులోని కూనాకరపేటకు చెందిన తాడి దానిరెడ్డి (59) మూడేకరాల పొలాన్ని కౌలుకు తీసుకుని సాగు చేస్తున్నారు. అతని భార్య సోమలక్ష్మి పక్షవాతంతో బాధ పడుతూ ఇంటికే  పరిమితమయ్యారు. వీరికి కుమారుడు, కుమార్తె ఉండగా.. వారికి వివాహాలు అయిపోయాయి. బుధవారం రాత్రి  వరి చేనుకు నీరు పెట్టేందుకు దానిరెడ్డి పొలానికి వెళ్లగా.. అక్కడ ఎల్‌టీ విద్యుత్తు లైను నుంచి తెగిన తీగపై కాలు వేయడంతో విద్యుదాఘాతానికి గురయ్యారు. దీంతో అతను అక్కడికక్కడే మృతి చెందారు.