Crime News: కొండపైకి గంజాయి.. తితిదే ఉద్యోగి అరెస్టు

తిరుమల, న్యూస్‌టుడే: తిరుమలకు గంజాయిని తరలిస్తున్న తితిదే ఔట్‌సోర్సింగ్‌ ఉద్యోగిని తిరుమల ఎస్‌ఈబీ పోలీస్‌ స్టేషన్‌ అధికారులు శుక్రవారం అదుపులోకి తీసుకున్నారు. తిరుపతికి చెందిన గంగాద్రి తిరుమలలోని వైకుంఠం క్యూకాంప్లెక్స్‌లోని లగేజీ కౌంటర్‌లో ఔట్‌సోర్సింగ్‌ ఉద్యోగిగా పని చేస్తున్నాడు. ఉదయం తిరుపతిలోని అలిపిరి సప్తగిరి తనిఖీ కేంద్రం వద్ద బ్యాగుతో అనుమానాస్పదంగా తిరుగుతుండగా, ఎస్‌ఈబీ అధికారులు అదుపులోకి తీసుకున్నారు. తనిఖీ చేయగా అతని వద్ద 15 ప్యాకెట్లలో నింపిన 150 గ్రాముల గంజాయి పట్టుబడింది. నిందితుడిని స్టేషన్‌కు తరలించి విచారిస్తున్నారు. సాయంత్రం విడుదలైన ఓ వీడియోలో నిందితుడు గంజాయిని ప్లాస్టిక్‌ కవర్‌లో చిన్న ప్యాకెట్లుగా ఉంచి, వాటిని కాలికి కట్టుకుని తిరుమలకు వచ్చినట్లుగా ఉంది.