ఇంట్లోకి చొరబడి దుండగుల కాల్పులు.. 8 ఏళ్ల బాలిక మృతి

ఆస్తి వివాదాలే కారణం!

బిహార్‌లోని భోజ్‌పుర్‌ జిల్లాలో దారుణ ఘటన చోటుచేసుకుంది. కొందరు దుండగులు ఓ ఇంట్లోకి చొరబడి కాల్పులు జరపడంతో ఎనిమిదేళ్ల చిన్నారి ప్రాణాలు కోల్పోయింది. ఆస్తి వివాదం నేపథ్యంలో నిందితులు ఈ దుశ్చర్యకు పాల్పడినట్లు తెలుస్తోంది. పోలీసులు, బాధిత కుటుంబ సభ్యులు తెలిపిన వివరాల ప్రకారం.. శుక్రవారం రాత్రి భిలాయి గ్రామానికి చెందిన కృష్ణసింగ్‌ ఇంట్లోకి నలుగురు వ్యక్తులు తుపాకులతో చొరబడ్డారు. ఆయన కుటుంబ సభ్యులను దూషిస్తూ విచక్షణారహితంగా కాల్పులు జరిపి పారిపోయారు. ఈ ఘటనలో కృష్ణసింగ్‌ కుమార్తె ఆరాధ్య ప్రాణాలు కోల్పోయింది. 25 ఎకరాల భూమికి సంబంధించి ఓ వ్యక్తితో తనకు వివాదం నడుస్తోందని, అతడే తన కుమార్తెను పొట్టనబెట్టుకున్నాడని కృష్ణ సింగ్‌ ఆవేదన వ్యక్తం చేశారు. ఇదే వివాదంలో నాలుగేళ్ల క్రితం తన సోదరుణ్ని కూడా చంపారని చెప్పారు. ఈ ఘటనపై దర్యాప్తు చేస్తున్నట్లు పోలీసులు తెలిపారు.