అంబేడ్కర్‌ విగ్రహం ధ్వంసం

పోలీసుల అదుపులో అనుమానితులు

తణుకు, న్యూస్‌టుడే: పశ్చిమగోదావరి జిల్లా తణుకు మండలం ముద్దాపురం ఉన్నత పాఠశాల ఆవరణలో డాక్టర్‌ బీఆర్‌ అంబేడ్కర్‌ విగ్రహాన్ని గుర్తు తెలియని వ్యక్తులు సోమవారం రాత్రి ధ్వంసం చేశారు. విగ్రహం తలను తొలగించారు. తల భాగం కోసం పోలీసులు గాలిస్తున్నారు. ఈ నేపథ్యంలో పలు దళిత సంఘాల నేతలు, అంబేడ్కర్‌వాదులు మంగళవారం గ్రామానికి చేరుకుని విగ్రహాన్ని ధ్వంసం చేసిన నిందితులను గుర్తించి కఠినంగా శిక్షించాలని డిమాండ్‌ చేశారు. తెదేపా మాజీ ఎమ్మెల్యే ఆరిమిల్లి రాధాకృష్ణ సంఘటన స్థలాన్ని పరిశీలించారు. ఇది కేవలం అంబేడ్కర్‌ విగ్రహంపై జరిగిన దాడి కాదని, దళితులపై దాడి అని విమర్శించారు. కొంత మంది అనుమానితులను అదుపులోకి తీసుకున్నామని సంఘటన స్థలాన్ని పరిశీలించిన జిల్లా ఎస్పీ రవిప్రకాశ్‌ తెలిపారు.
బీ అంబేడ్కర్‌ విగ్రహం ధ్వంసం చేయడం ప్రజాస్వామ్యానికి మచ్చ అని తెదేపా మాజీ మంత్రి కె.ఎస్‌.జవహర్‌ ధ్వజమెత్తారు. ఇలాంటి సంఘటనలు పునరావృతం కాకుండా చర్యలు తీసుకోవాలని ప్రకటనలో డిమాండ్‌ చేశారు.