పెళ్లి చేసుకోవాలని వేధింపులు.. యువకుణ్ని హతమార్చిన యువతి

ఏటూరునాగారం, న్యూస్‌టుడే: పెళ్లి చేసుకోవాలంటూ నిత్యం వేధిస్తుండటాన్ని భరించలేక ఓ యువతి.. యువకుడిని కత్తితో పొడిచి హత్య చేసింది. ములుగు జిల్లా ఏటూరునాగారం మండల కేంద్రంలో బుధవారం అర్ధరాత్రి ఈ ఘటన చోటుచేసుకుంది. ఏటూరునాగారం ఎస్సై డి.రమేష్‌ కథనం ప్రకారం.. ఏటూరునాగారంలోని అంబేడ్కర్‌నగర్‌కు చెందిన రాంటెంకి శ్రీనివాస్‌(30), జాడి సంగీత చిన్నప్పటి నుంచి స్నేహితులు. సంగీతకు తల్లిదండ్రులు, తోబుట్టువులు ఎవరూ లేరు. వివాహం కాలేదు. అమ్మమ్మ ఇంటి వద్ద ఉంటున్న ఆ యువతి కూలి పనులు చేసుకుంటూ జీవిస్తోంది. శ్రీనివాస్‌కు వివాహమైనా కొన్నేళ్ల క్రితం భార్య అతణ్ని విడిచి వెళ్లిపోయింది. అప్పటి నుంచి ఒంటరిగానే ఉంటున్న ఆయన కూలి పనులకెళ్తూ జీవనం సాగిస్తున్నాడు. ఈ క్రమంలో తనను పెళ్లి చేసుకోవాలంటూ సంగీతను కొన్నాళ్లుగా శ్రీనివాస్‌ వేధిస్తున్నాడు. ఈ విషయమై బాధితురాలు గతంలో ఫిర్యాదు చేయగా.. పోలీసులు శ్రీనివాస్‌పై కేసు నమోదు చేసి జైలుకు పంపారు. జైలు నుంచి వచ్చిన తర్వాత పద్ధతి మార్చుకోకుండా ఆమెను ఇంకా తీవ్రంగా వేధించాడు. బుధవారం రాత్రి 9 గంటలకు అతడు యువతి ఇంటికి వెళ్లి పిలవగా తలుపులు తెరవలేదు. అర్ధరాత్రి 12 గంటలకు మరోసారి వెళ్లాడు. అప్పటికే వేసుకున్న పథకం ప్రకారం సంగీత శ్రీనివాస్‌ను ఇంట్లోకి రానిచ్చింది. మాటల్లో పెట్టి అతడి చేతులు కట్టేసి ఇంటి బయట ఓ కొయ్యకు బంధించింది. తర్వాత కత్తితో పొడిచి హత్య చేసింది. అనంతరం పోలీసుస్టేషన్‌కు వెళ్లి లొంగిపోయింది. గురువారం ఉదయం సంఘటనా స్థలాన్ని పరిశీలించిన పోలీసులు నిందితురాలిపై కేసు నమోదు చేశారు.