తేనెటీగల దాడితో పరుగెత్తి.. బావిలో పడి మృతి చెందిన రైతు

కొత్తగూడ, న్యూస్‌టుడే: మహబూబాబాద్‌ జిల్లా కొత్తగూడ మండలం నీలంపల్లి గ్రామంలో తేనెటీగలు దాడి చేయడంతో భయంతో పరుగెత్తి బావిలో పడి ఓ రైతు మృతిచెందారు. పోలీసులు, స్థానికులు తెలిపిన వివరాల ప్రకారం.. ఎదుళ్లపల్లి గ్రామానికి చెందిన అన్నదమ్ములు కొన్‌రెడ్డి సంజీవరెడ్డి (59), జనార్దన్‌ రెడ్డి శుక్రవారం నీలంపల్లిలోని తమ పొలం వద్దకు వెళ్లారు. పొలం పనులు చేస్తుండగా పక్కనే చెట్టుపై ఉన్న తేనెతుట్టె నుంచి ఒక్కసారిగా తేనెటీగలు లేచి దాడి చేయడంతో.. వారు పరుగెడుతూ సమీపంలోని వ్యవసాయ బావిలో దూకారు. అన్న సంజీవరెడ్డికి ఈత రాకపోవడంతో నీటమునిగి మృతిచెందగా, తమ్ముడు జనార్దన్‌ రెడ్డి ఈదుకుని ప్రాణాలతో బయటపడ్డారు. స్థానికులు సమాచారమివ్వడంతో కొత్తగూడ ఎస్సై నగేశ్‌ సంఘటన స్థలానికి చేరుకుని పరిశీలించారు. మృతుడికి భార్య, ఒక కుమారుడు, కుమార్తె ఉన్నారు.