బాలుడి తలలో దిగిన ఇనుపచువ్వ

మలికిపురం, న్యూస్‌టుడే: డాక్టరు బీఆర్‌ అంబేడ్కర్‌ కోనసీమ జిల్లా మలికిపురం మండలం విశ్వేశ్వరాయపురంలో బాలుడి తలలోకి ప్రమాదవశాత్తు ఇనుప చువ్వ దూసుకెళ్లింది. సఖినేటిపల్లి మండలం రామేశ్వరానికి చెందిన అన్నంనీడి శ్రీనివాసరావు, సత్యవాణిల కుమారుడు పూర్ణచంద్ర విశ్వేశ్వరాయపురంలో తాతయ్య ఇంట్లో ఉంటూ చదువుకుంటున్నాడు. శనివారం మధ్యాహ్నం ఇంటి వద్దే ఉన్న పూర్ణచంద్ర.. పక్కనే నిర్మాణంలో ఉన్న ఓ ఇంటి వద్ద ఆడుకుంటూ వెళ్లి అక్కడ కుప్పగా పోసిన చువ్వలపై పడిపోయాడు. అందులోని 6 ఎంఎం ఊచ పూర్ణచంద్ర ఎడమ కణత భాగం నుంచి గుచ్చుకుంది. స్థానికులు బాలుడిని వెంటనే లక్కవరం పీహెచ్‌సీకి తరలించారు. వైద్యాధికారి ఎం.దుర్గాప్రసాద్‌ ప్రథమ చికిత్స చేసి, మెరుగైన వైద్యం నిమిత్తం కాకినాడకు తరలించారు.