గగనతలంలో ఎయిర్‌హోస్టెస్‌తో వృద్ధుడి అసభ్య ప్రవర్తన

గగన యానాల్లో ఇటీవలి కాలంలో వెలుగుచూస్తున్న కొందరు ప్రయాణికుల అనుచిత ప్రవర్తనల పరంపరలో మరో తాజా ఘటన ఇది. బ్యాంకాక్‌ నుంచి ముంబయికి వస్తున్న ఇండిగో విమానంలో ఓ ప్రయాణికుడు విచక్షణ కోల్పోయి ఎయిర్‌హోస్టెస్‌తో అసభ్యంగా ప్రవర్తించాడు. కోరిన ఆహారం అందుబాటులో లేదని చెప్పగా.. అనుచితంగా ప్రవర్తించడం మొదలుపెట్టాడు. ఆ తర్వాత చికెన్‌ డిష్‌ తీసుకోడానికి అంగీకరించాడు. చెల్లింపుల నిమిత్తం పీవోఎస్‌ మెషిన్‌ తీసుకురాగా.. కార్డు స్వైపింగు వంకతో ఆమెను అసభ్యంగా తాకాడు. దీనిపై ఎయిర్‌హోస్టెస్‌ తీవ్ర అభ్యంతరం వ్యక్తం చేయగా.. ఆ వ్యక్తి సీటు నుంచి లేచి మరీ అందరి ముందు వేధించాడు. అక్కడితో ఆగకుండా ఇతర సిబ్బందిని, తోటి ప్రయాణికులను సైతం ఇబ్బంది పెట్టాడు. విమానం ముంబయికి చేరుకోగానే.. అప్పటికే సమాచారం అందిన పోలీసులు అతడిని అదుపులోకి తీసుకున్నారు. ఆ వ్యక్తి.. స్వీడన్‌కు చెందిన 62 ఏళ్ల క్లాస్‌ ఎరిక్‌ హరాల్డ్‌ జొనాస్‌ వెస్ట్‌బర్గ్‌ అని పోలీసులు తెలిపారు. తర్వాత అతణ్ని కోర్టు ముందు హాజరుపరచగా.. బెయిలు మంజూరైంది.