పెద్ద నోట్లకు ఆశపడితే ఉన్న నోట్లు జారిపాయే.. సినీఫక్కీలో ₹50 లక్షల చోరీ!

రాజానగరం, న్యూస్‌టుడే: అడ్డదారిలో డబ్బు సంపాదించాలనుకున్న అత్యాశ ఓ వ్యక్తిని నిండా ముంచింది. రూ. 2,000 నోట్ల రద్దును దుండగులు తమకు అనుకూలంగా మార్చుకుని మోసానికి పాల్పడ్డారు. తూర్పుగోదావరి జిల్లా రాజానగరం పోలీస్‌స్టేషన్‌ పరిధి కొంతమూరులో చోటు చేసుకున్న ఈ ఘటన వివరాలను సీఐ కాశీవిశ్వనాథ్‌ శుక్రవారం తెలియజేశారు. డా..బి.ఆర్‌.అంబేడ్కర్‌ కోనసీమ జిల్లా మండపేటకు చెందిన మాజేటి లక్ష్మీనారాయణ కిరాణా వ్యాపారం చేస్తుంటారు. ఓ వ్యక్తి రూ. 50 లక్షల విలువైన రూ.500 నోట్లు ఇస్తే రూ.60 లక్షల విలువైన  రూ.2,000 నోట్లు ఇస్తున్నాడంటూ ఓ స్నేహితుడు చెప్పాడు. సెప్టెంబరు వరకు గడువు ఉన్నందున ఈలోపు ఆ నోట్లు మార్చుకోవచ్చని నమ్మబలికాడు. దీంతో లక్ష్మీనారాయణ గురువారం రాత్రి రూ. 50 లక్షల మేరకు రూ. 500 నోట్లు తీసుకుని కొంతమూరు చేరుకున్నారు. అక్కడకు వచ్చిన ఇద్దరు వ్యక్తులతో మాట్లాడుతుండగా పోలీస్‌ సైరన్‌ వేసుకుంటూ కారులో నలుగురు వ్యక్తులు వచ్చి బాధితుడిని బెదిరించి ఆ నగదు అపహరించుకుపోయారు. ఈ పరిణామానికి బిత్తరపోయిన ఆయన శుక్రవారం పోలీసులకు ఫిర్యాదు చేశారు.