శోభనం గదిలోకి పంపితే.. శవాలుగా మిగిలారు

ఒకే చితిపై నవ దంపతుల అంత్యక్రియలు

ఉత్తర్‌ప్రదేశ్‌లోని బహ్రాయిచ్‌ జిల్లాలో దారుణం జరిగింది. 22 ఏళ్ల ప్రతాప్‌ యాదవ్‌కు 20 ఏళ్ల పుష్పతో మే 30న (మంగళవారం) పెద్దలు ఘనంగా పెళ్లి చేశారు. కొత్తజీవితంపై ఎన్నో ఆశలతో ఉన్న ఈ నవ యువజంటను ఆ రోజు రాత్రి శోభనం గదిలోకి పంపారు. మరుసటిరోజు ఉదయాన్నే గది తలుపులు తెరిచి చూడగా ఇద్దరూ విగతజీవులుగా మంచంపై పడున్నారు. ఇద్దరి కుటుంబాలు ఘొల్లుమన్నాయి. ఘటనా స్థలాన్ని పరిశీలించిన పోలీసులు మృతదేహాలను పోస్టుమార్టం నిమిత్తం ఆసుపత్రికి తరలించారు. జిల్లా ఎస్పీ ప్రశాంత్‌వర్మ మాట్లాడుతూ.. నవ దంపతులు ఇద్దరూ గుండెపోటుతో మృతిచెందినట్లుగా వైద్య నివేదికల్లో తేలిందన్నారు. ప్రతాప్‌ స్వగ్రామంలో జరిగిన వీరి అంత్యక్రియలకు భారీసంఖ్యలో జనం తరలివచ్చారు. నూరేళ్ల జీవితం కలిసి పంచుకుందామని ఏకమైన కొన్ని గంటలకే ఆకస్మిక మరణానికి గురైన ఆ యువజంటను ఒకే చితిపైకి చేర్చి దహన సంస్కారాలు పూర్తి చేశారు.