వీధి కుక్కల దాడిలో చిన్నారికి గాయాలు

గాండ్లపెంట, న్యూస్‌టుడే: శ్రీసత్యసాయి జిల్లా గాండ్లపెంటలోని రామాలయం వీధి సమీపంలో వీధి కుక్కల దాడిలో మౌనిక, రవీంద్రరెడ్డిల కుమార్తె బేబి గాయపడింది. ఇంటి నుంచి వీధిలోకి వచ్చిన బాలికపై వీధి కుక్కలు ఒక్కసారిగా దాడి చేశాయి. తీవ్రంగా గాయపడటంతో ఆసుపత్రికి తరలించారు. గతంలో కూడా కుక్కల దాడిలో బేబితోపాటు మరొకరు గాయపడినట్లు బాలిక తల్లిదండ్రులు తెలిపారు. వీధి కుక్కల సమస్యను పంచాయతీ అధికారుల దృష్టికి తీసుకెళ్లినా.. ప్రయోజనం లేదని వారు వాపోయారు. ఇప్పటికైనా సంబంధిత అధికారులు స్పందించి చర్యలు తీసుకోవాలని గ్రామస్థులు కోరుతున్నారు.