ఆర్థిక ఇబ్బందులతో రైతు ఆత్మహత్య

చిన్నశంకరంపేట, న్యూస్‌టుడే: ఆర్థిక ఇబ్బందులతో సతమతమవుతున్న ఓ రైతు ఆత్మహత్యకు పాల్పడ్డ ఘటన మెదక్‌ జిల్లా చిన్నశంకరంపేట మండలం ఖాజాపూర్‌లో చోటు చేసుకుంది. ఎస్సై సుభాష్‌గౌడ్‌ తెలిపిన వివరాల ప్రకారం.. గ్రామానికి చెందిన రైతు సత్యనారాయణ(45) తన రెండెకరాల్లో వరి సాగు చేశారు. పంట పెట్టుబడితోపాటు గతేడాది సోదరి వివాహం కోసం రూ.4 లక్షల వరకు అప్పు చేశారు. చేతికొచ్చిన పంట వర్షాలకు తడిసింది. అష్టకష్టాలు పడి ఆరబెట్టిన తరువాత 12 రోజుల క్రితం ఖాజాపూర్‌ కొనుగోలు కేంద్రంలో విక్రయించగా 47 క్వింటాళ్లే వచ్చాయి.ఈ నగదు ఇంకా జమకాలేదు. తక్కువ డబ్బులు వస్తాయన్న దిగులుతోపాటు అప్పులెలా తీర్చాలనే మనోవేదనతో ఈ నెల 4న పురుగు మందు తాగారు. కుటుంబసభ్యులు గమనించి మొదట మెదక్‌ ఏరియా ఆసుపత్రికి, తరువాత సికింద్రాబాద్‌లోని గాంధీకి తరలించారు. అక్కడే చికిత్స పొందుతూ మంగళవారం మృతిచెందారు. కేసు నమోదు చేసి దర్యాప్తు చేపట్టినట్లు ఎస్సై పేర్కొన్నారు.