Srikakulam: కొట్లాటకు దారి తీసిన ప్రేమ వివాహం

కొల్లివలసలో ఉద్రిక్తత

బూర్జ: బూర్జ మండలంలోని కొల్లివలసలో మంగళవారం సాయంత్రం ఉద్రిక్తత నెలకొంది. ఓ ప్రేమ వివాహం రెండు కుటుంబాల మధ్య ఘర్షణకు దారితీసింది. ఇరువర్గాల కొట్లాటకు దిగడంతో పలువురు గాయపడ్డారు. పోలీసులు, స్థానికుల వివరాల మేరకు... గ్రామానికి చెందిన ఓ జంట జూన్‌ 1న ప్రేమ వివాహం చేసుకున్నారు. చాలాకాలంగా వీరిద్దరు ప్రేమించుకుంటున్నా.. వేర్వేరు సామాజిక వర్గాలు కావడంతో అమ్మాయి ఇంట్లో అంగీకరించలేదు. దీంతో ఇద్దరు వెళ్లిపోయి రిజిస్టర్‌ వివాహం చేసుకున్నారు. ఆ తర్వాత తమకు రక్షణ కల్పించాలని, బుధవారం వస్తున్నామని ముందస్తుగా పోలీసులకు సమాచారం ఇచ్చారు. ఈ నేపథ్యంలో అమ్మాయి కుటుంబ సభ్యులు మూకుమ్మడిగా అబ్బాయి ఇంటి మీదకు వెళ్లడంతో గొడవ జరిగింది. అక్కడ మాటా మాటా పెరిగి ఇరువర్గాలు కొట్లాటకు దిగాయి. కర్రలతో విచక్షణా రహితంగా దాడి చేసుకున్నారు. సమాచారం తెలియగానే ఎస్సై బి.అశోక్‌బాబు సిబ్బందితో గ్రామానికి చేరుకొని పరిస్థితిని అదుపు చేశారు. ఘటనలో అయిదుగురు గాయపడినట్లు గుర్తించామని, దీనిపై విచారించి కేసు నమోదు చేస్తామని ఎస్‌ఐ చెప్పారు. గ్రామంలో శాంతి భద్రతలకు విఘాతం కలగకుండా పోలీసు బందోబస్తు ఏర్పాటు చేశామన్నారు.