బధిర మహిళపై అత్యాచారయత్నం

దిశయాప్‌లో ఫిర్యాదు చేసిన స్థానికులు
సకాలంలో స్పందించి కాపాడిన పోలీసులు

కందుకూరు పట్టణం, నెల్లూరు (నేర విభాగం), న్యూస్‌టుడే: శ్రీపొట్టిశ్రీరాములు నెల్లూరు జిల్లా కందుకూరులో బధిర మహిళపై అత్యాచారయత్నం జరిగింది. పోలీసుల వివరాల ప్రకారం.. మండలంలోని మాచవరం గ్రామానికి చెందిన ఓ మహిళ మంగళవారం సాయంత్రం కందుకూరు వచ్చారు. బస్టాండ్‌ నుంచి రాత్రి కొండముడుసుపాలెం వైపు నడుచుకుంటూ వెళుతుండగా.. పెట్రోల్‌ బంక్‌ సమీపాన ముగ్గురు వ్యక్తులు ఊరికి తీసుకెళతామని చెప్పి ఆటోలో ఎక్కించుకున్నారు. తర్వాత రోడ్డు పక్కకు బలవంతంగా లాక్కెళ్లి అత్యాచారానికి యత్నించారు. ఆమె గట్టిగా అరవడంతో సమీపంలోనే ఉన్న పెట్రోల్‌ బంకు సిబ్బంది దిశ యాప్‌ ద్వారా పోలీసులకు సమాచారం అందించారు. దగ్గర్లోనే ఉన్న గస్తీ పోలీసులు బంకు సిబ్బందితో కలసి వెళ్లి ఆమెను రక్షించారు. పారిపోయిన నిందితులను పట్టుకున్నారు. వారిలో ఇద్దరు నేపాల్‌ నుంచి వచ్చి పట్టణంలో గూర్ఖాలుగా పనిచేస్తున్న కరణ్‌, జోషి కాగా మరొకర్ని పట్టణంలో ఆటోడ్రైవర్‌ సయ్యద్‌ఫిరోజ్‌గా గుర్తించినట్లు డీఎస్పీ ఎ.రామచంద్ర వెల్లడించారు. ఆయన సీఐతో కలసి బుధవారం ఘటనాస్థలాన్ని పరిశీలించారు. నిందితులపై ఎట్రాసిటీ, అత్యాచార యత్నం కేసులు నమోదు చేసి దర్యాప్తు చేస్తున్నామన్నారు. బాధితురాలిని ఇంటికి చేర్చామని తెలిపారు. దిశ యాప్‌ ద్వారా మహిళను సకాలంలో రక్షించినట్లు ఎస్పీ కె.తిరుమలేశ్వరరెడ్డి నెల్లూరులో విలేకర్లకు చెప్పారు.