సహజీవనం చేస్తున్న మహిళ దారుణ హత్య

ముక్కలుగా చేసి.. బకెట్‌లో దాచి..
మహారాష్ట్రలో ఓ వ్యక్తి ఘాతుకం

ఠాణె: శ్రద్ధావాకర్‌ హత్య కేసును ఇంకా మర్చిపోకముందే మహారాష్ట్ర ఠాణె జిల్లాలో అంతకు మించిన దారుణం వెలుగుచూసింది. నయా నగర్‌ పోలీసులు వెల్లడించిన వివరాలు ప్రకారం.. మనోజ్‌ సహానీ(56), సరస్వతి వైద్య(36) ముంబయి శివారులోని మీరా-భయందర్‌ ప్రాంతంలోని ఓ ఫ్లాట్‌లో అద్దెకుంటూ గత మూడేళ్లుగా సహజీవనంలో ఉన్నారు. వారు ఉంటున్న ఇంటి నుంచి బుధవారం దుర్వాసన వస్తుండటంతో గుర్తించిన పొరుగింటివారు, హౌసింగ్‌ సొసైటీ అధికారులు పోలీసులకు ఫిర్యాదు చేశారు. వారు ఘటనా స్థలానికి చేరుకోవడంతో సరస్వతి హత్య గురించి వెలుగులోకి వచ్చింది. ఆ ఇంట్లో మృతురాలి శరీర భాగాల ముక్కలను బకెట్‌, టబ్‌ల్లో పోలీసులు గుర్తించారు. దాదాపు నాలుగు రోజుల క్రితమే ఆమె హత్య జరిగినట్లు వారు అంచనా వేశారు. వారిద్దరి మధ్య జరిగిన గొడవే ఈ దారుణానికి కారణమై ఉంటుందని భావిస్తున్నారు. ఈ హత్యను దాచిపెట్టేందుకు అతడు యత్నించాడని, దుర్వాసన రాకుండా రూమ్‌ ఫ్రెషనర్‌ను వాడినట్లు తెలిపారు. ఆమె శరీర భాగాల్లో కొన్నింటిని నిందితుడు కుక్కర్‌లో ఉడికించినట్లు, కాల్చినట్లు గుర్తించారు. మృతురాలి శరీరభాగాలను పోలీసులు స్వాధీనం చేసుకున్నారు. మనోజ్‌.. బోరివాలీ ప్రాంతంలో ఓ రేషన్‌ దుకాణంలో పనిచేస్తున్నాడని స్థానికులు తెలిపారు. మృతురాలు సరస్వతిని అనాథగా గుర్తించారు. మనోజ్‌ సహానీని అరెస్టు చేసినట్లు పోలీసులు గురువారం వెల్లడించారు.