స్నేహితుల మధ్య చిచ్చురేపిన సిగరెట్‌?

సహచరుడి గొంతుకోసి హతమార్చిన వైనం

విశాఖపట్నం, న్యూస్‌టుడే: సిగరెట్‌ కోసం జరిగిన ఘర్షణలో ఓ బాలుడిని తోటి స్నేహితులు గొంతుకోసి హతమార్చిన ఘటన విశాఖలో కలకలం సృష్టించింది. సీఐ రేవతమ్మ కథనం ప్రకారం... ఏవీఎన్‌ కళాశాల సమీపంలో నూకాలమ్మ అనే మహిళ తన కుమారుడు చిన్నా(17)తో కలిసి నివసిస్తోంది. చిన్నా కొద్దికాలంగా వ్యసనాలకు బానిసయ్యాడు. పాతనగరంలోని విస్కీ అనే రౌడీషీటర్‌ను ఆదర్శంగా తీసుకున్నాడు. ఈ నెల 20న స్నేహితులతో కలిసి చవితి ఉత్సవాల్లో పాల్గొన్నాడు. 21 అర్ధరాత్రి దాటాక చిన్నా, మరో నలుగురు బాలురు సిగరెట్లు తాగారు. సిగరెట్‌ విషయమై వారి మధ్య ఘర్షణ జరిగింది. ఈ క్రమంలో స్నేహితులు కత్తితో చిన్నాను గొంతు కోసి హతమార్చి గోనె సంచితో మృతదేహాన్ని దాచిపెట్టారు. వినాయకచవితి ఉత్సవ సామగ్రిని సముద్రంలో కలపాలని తెల్లవారుజామున ఆటోడ్రైవర్‌ రాముతో బేరం కుదుర్చుకున్నారు. మృతదేహాన్ని ఆటోలో చేపలరేవు వద్దకు తీసుకెళ్లి సముద్రంలో విసిరేసి వెళ్లిపోయారు. మృతదేహం దొరికిన తర్వాత పోలీసులు ఆటోడ్రైవర్‌ను గుర్తించి విచారించగా నలుగురు పిల్లల గురించి చెప్పాడు. వారిని శనివారం అదుపులోకి తీసుకున్నారు. విచారణలో నిందితులు నేరాన్ని అంగీకరించారు. ఆ నలుగురినీ జువైనల్‌ హోంకు తరలించారు. పిల్లల మధ్య ఘర్షణకు గంజాయి కారణమై ఉంటుందని స్థానికులు అనుమానిస్తున్నారు.