ఐసిస్‌ ఉగ్రవాది షానవాజ్‌ అరెస్ట్‌

దిల్లీ: జాతీయ దర్యాప్తు సంస్థ (ఎన్‌ఐఏ) తీవ్రంగా గాలిస్తున్న ఐసిస్‌ ఉగ్రవాది మహమ్మద్‌ షానవాజ్‌ అలియాస్‌ షఫీ ఉజామాను, మరో ఇద్దరు అతడి అనుచరులను సోమవారం దిల్లీ పోలీసులు అరెస్టుచేశారు. షానవాజ్‌ను దేశ రాజధానిలోని జైత్‌పుర్‌లో అరెస్టు చేయగా, అతడి అనుచరులు మొహమ్మద్‌ రిజ్వాన్‌ అష్రాఫ్‌, మొహమ్మద్‌ అర్షద్‌ వార్సీలను ఉత్తర్‌ప్రదేశ్‌లోని లఖ్‌నవూ, మొరాదాబాద్‌లలో అదుపులోకి తీసుకున్నారు. అరెస్టైన ముగ్గురు ఉగ్రవాదులు ఇంజినీర్లని పోలీసులు తెలిపారు. వారు వారం రోజులపాటు పోలీసు కస్టడీలో ఉండనున్నారు. షానవాజ్‌ పుణెలో పోలీస్‌ కస్టడీ నుంచి తప్పించుకొని దిల్లీలో రహస్యంగా ఉంటున్నాడు. అతడిపై రూ.3 లక్షల రివార్డు ఉంది. మరోవైపు, షానవాజ్‌ నుంచి ఐఈడీలను తయారు చేయడానికి ఉపయోగించే ప్లాస్టిక్‌ గొట్టాలు, ఇనుప గొట్టాలు, వివిధ రకాల రసాయనాలు, టైమింగ్‌ పరికరాలను పోలీసులు స్వాధీనం చేసుకున్నారు. బాంబుల తయారీకి సంబంధించిన సాహిత్యాన్ని కూడా అతని వద్ద గుర్తించారు.