పేదరికమే పెనుశాపమైన వేళ..

పెంచే స్తోమత లేక ముగ్గురు కుమార్తెలను చంపేసిన తల్లిదండ్రులు
పంజాబ్‌లోని జలంధర్‌ జిల్లాలో ఘోరం

చండీగఢ్‌: పేదరికం కారణంగా సంతానాన్ని పెంచి పెద్దచేయలేమన్న ఆందోళనతో ఓ దంపతులు తమ ముగ్గురు కుమార్తెలను హత్య చేశారు. పంజాబ్‌లోని జలంధర్‌ జిల్లాలో ఈ విషాద ఘటన చోటుచేసుకుంది. రోజువారీ కూలీలైన సుశీల్‌ మండల్‌, అతని భార్య మంజుదేవి కొన్నాళ్ల కిందట జలంధర్‌ జిల్లాలోని కాన్పుర్‌ గ్రామానికి వలస వచ్చారు. పేదరికంలో మగ్గుతున్న వీరు ఆదివారం తమ కుమార్తెలు కాంచన (4), శక్తి (7), అమృత (9)లకు పురుగుల మందు కలిపిన పాలు ఇచ్చారు. వారు మరణించాక మృతదేహాలను ట్రంకుపెట్టెలో ఉంచారు. అనంతరం తమ కుమార్తెలు కనిపించడం లేదంటూ మక్సుదాన్‌ పోలీస్‌స్టేషన్‌లో ఫిర్యాదు చేశారు. విచారణలో భాగంగా పోలీసులు వీరిని గట్టిగా నిలదీయగా అసలు విషయం బయటపడింది. ఐదుగురి సంతానంలో ఇద్దరిని మాత్రమే పెంచగలిగే ఆర్థిక స్థోమత తమకు ఉందని, అందుకే ముగ్గురిని హత్య చేశామని సుశీల్‌ మండల్‌, మంజుదేవి అంగీకరించారు. పోలీసులు హత్య కేసు నమోదుచేసి వారిని అరెస్టుచేశారు.