పార్కులో జంటను బెదిరించి.. యువతిపై పోలీసుల లైంగిక వేధింపులు

లఖ్‌నవూ: త్వరలో వివాహం చేసుకోబోతున్న ఓ జంటను కొందరు పోలీసులు వేధింపులకు గురిచేశారు. ఉత్తర్‌ప్రదేశ్‌లో చోటుచేసుకున్న ఈ ఘటన ఆలస్యంగా వెలుగులోకి వచ్చింది. బులంద్‌శహర్‌కు చెందిన ఓ యువతి, యువకుడు త్వరలో వివాహం చేసుకోనున్నారు. ఈ క్రమంలోనే సరదాగా గడిపేందుకు స్థానిక పార్క్‌కు వెళ్లారు. ఆ సమయంలో ముగ్గురు పోలీసులు వారిని రూ.10 వేలు ఇవ్వాలని డిమాండ్‌ చేశారు. లేకుంటే జైలుకే అంటూ యువకుడిని బెదిరించారు. తమని వదిలేయమంటూ పోలీసుల కాళ్లు పట్టుకొని ఆ జంట వేడుకున్నా కనికరించలేదు. యువకుడి నుంచి కొంత డబ్బును బలవంతంగా బదిలీ చేయించుకున్నారు. అవి సరిపోవంటూ రూ.5 లక్షలు ఇవ్వాలంటూ బెదిరించారు. యువతి పట్ల అసభ్యకరంగా ప్రవర్తించారు. తరచూ యువతికి ఫోన్‌ చేసి వేధింపులకు పాల్పడడమే కాకుండా యువతిని కలిసేందుకు ఆమె ఇంటికి కూడా వచ్చేవారు. దీంతో ఆ జంట.. స్థానిక పోలీస్‌ స్టేషన్‌లో ఫిర్యాదు చేసింది. పోలీసులు ఆ ముగ్గురిపై కేసు నమోదు చేశారు. నిందితులను రాకేశ్‌ కుమార్‌, దిగంబర్‌ కుమార్‌గా గుర్తించారు. మూడో వ్యక్తి వివరాలు తెలియాల్సి ఉంది. ప్రస్తుతం నిందితులు పరారీలో ఉన్నారు.