తండ్రి కళ్లెదుటే ఘోరం

కంటైనర్‌ ఢీకొని ఇద్దరు కుమారుల మృతి

తుని పట్టణం, న్యూస్‌టుడే: తూర్పు గోదావరి జిల్లా తుని పట్టణంలో ఆదివారం ఉదయం జరిగిన రోడ్డు ప్రమాదంలో తండ్రి కళ్ల ముందే ఇద్దరు కుమారులు ప్రాణాలు విడిచారు. విశాఖ జిల్లా కోటవురట్లకు చెందిన బర్రే వేణు, ఆయన భార్య లోవలక్ష్మి పాయకరావుపేట మండలం పాల్తేరులోని ఇటుకల బట్టీలో పనిచేస్తున్నారు. వారి కుమారులు దుర్గాప్రసాద్‌(17), తాతాజీ(7) స్వగ్రామమైన కోటవురట్లలోనే చదువుకుంటున్నారు. కుమారులను తీసుకురావడానికి వేణు శనివారం తన సొంతూరికి వెళ్లారు. ఆదివారం ఉదయం ద్విచక్రవాహనంపై తండ్రీకొడుకులు పాల్తేరుకు బయలుదేరారు. తుని పట్టణానికి చేరుకోగానే వెనుక నుంచి వచ్చిన ఓ కంటైనర్‌ వారి ద్విచక్రవాహనాన్ని ఢీకొనడంతో దాని చక్రాల కిందపడి ఇద్దరు కుమారులు తండ్రి కళ్లెదుటే మృతి చెందారు. తండ్రి ప్రాణాపాయం నుంచి బయటపడ్డాడు. కొద్ది రోజులు పిల్లలను తమ వద్ద ఉంచుకుందామంటే.. తిరిగిరాని లోకాలకు వెళ్లారని తల్లి లోవలక్ష్మి కన్నీరుమున్నీరయ్యారు.