AP News: యువకుడిని చితకబాదిన ఎస్సై

వీఆర్‌కు బదిలీ చేసిన ఎస్పీ

కడప నేరవార్తలు, న్యూస్‌టుడే: కడప నగరంలో ఓ ఎస్సై ప్రవర్తన విమర్శలకు తావిచ్చింది. కర్ఫ్యూ నిబంధనలు ఉల్లంఘించాడని ఓ యువకుడిని చితకబాదిన సంఘటన ఆలస్యంగా వెలుగులోకి వచ్చింది. ఆ దృశ్యాలు సామాజిక మాధ్యమాల్లో హల్‌చల్‌ చేస్తున్నాయి. ఈ నెల 25న కర్ఫ్యూ ఆంక్షలు కొనసాగుతున్న సమయంలో ఓ యువకుడు ద్విచక్రవాహనంపై వెళ్తుండగా ఎదురుగా కడప రెండో పట్టణ ఠాణా ఎస్సై జీవన్‌రెడ్డి కనిపించారు. యువకుడు భయపడి వాహనాన్ని వెనక్కి తిప్పి కొద్ది దూరం రాగానే అదుపు తప్పి కిందపడ్డాడు. వెంటనే ఎస్సై అక్కడికి వచ్చి అతన్ని లాఠీతో చితకబాదారు. యువకుడు ఎస్సై కాళ్లు పట్టుకున్నప్పటికీ వదిలిపెట్టలేదు. దీంతో ఒళ్లంతా గాయాలయ్యాయి. విషయం తెలుసుకున్న ఎస్పీ అన్బురాజన్‌ విచారించి ఎస్సైని వీఆర్‌కు బదిలీ చేశారు.