Crime News: చాక్లెట్ల ఆశ చూపి చిదిమేశారు

నిజామాబాద్‌లో ఇద్దరు చిన్నారులపై దివ్యాంగుడి అఘాయిత్యం
ఎల్లారెడ్డి డివిజన్‌లో ఆరేళ్ల పాపపై బాలుడి అత్యాచారం

నిందితుడు వసీం

నిజామాబాద్‌ నేరవార్తలు, ఎల్లారెడ్డి గ్రామీణం, న్యూస్‌టుడే: నిజామాబాద్‌, కామారెడ్డి జిల్లాల్లో రెండు అమానుష ఘటనలు చోటు చేసుకున్నాయి. అభంశుభం తెలియని చిన్నారులకు చాక్లెట్ల ఆశ చూపి అఘాయిత్యానికి పాల్పడ్డారు. ఒక కేసులో నిందితుడు దివ్యాంగుడు కాగా మరో కేసులో ఈ దారుణానికి పాల్పడింది పదిహేనేళ్ల బాలుడు కావడం గమనార్హం. నిజామాబాద్‌ ఏసీపీ ఆరె వెంకటేశ్వర్‌ కథనం ప్రకారం.. ఓ కాలనీలో కూలీ పనులు చేసుకుని బతికే కుటుంబాలకు నివసిస్తున్నాయి. పెద్దలు పిల్లలను ఇంట్లో వదిలి పనులకు వెళ్తుంటారు. ఆదివారం కాలనీలో ఆడుకుంటున్న చిన్నారులపై (8, 12 ఏళ్లు) స్థానికుడైన వసీం (33) కన్నేశాడు. వారికి చాక్లెట్ల ఆశ చూపించి నిర్మానుష్య ప్రదేశానికి తీసుకెళ్లి లైంగిక దాడి జరిపాడు. బుధవారం ఓ బాలికకు నొప్పి రావడంతో కుటుంబీకులకు తెలియజేయగా విషయం బయటపడింది. వారు గురువారం పోలీసులకు ఫిర్యాదు చేశారు. నిందితుడు వసీంను రిమాండుకు తరలించినట్లు ఏసీపీ తెలిపారు. పోలియో పీడితుడైన అతడు మేస్త్రీగా పనిచేస్తుంటాడు. అతడికి భార్య, ఓ పాప ఉన్నారు. మరో ఘటనలో ఎల్లారెడ్డి డివిజన్‌లో ఇంటి బయట ఆడుకుంటున్న ఆరేళ్ల చిన్నారిపై అదే కాలనీకి చెందిన పదిహేనేళ్ల బాలుడు గురువారం చాక్లెట్‌ ఆశ చూపి ఇంటి వెనక్కు తీసుకెళ్లి అత్యాచారం చేశాడు. ఇంట్లో నిద్రపోతున్న తల్లి బాలిక కేకలు విని వచ్చి చూసేసరికి బాలుడు పారిపోతూ కనిపించాడు. బాధితులు ఠాణాలో ఫిర్యాదు చేశారు.