కల్లు తాగిన 30 మందికి అస్వస్థత

మెదక్‌లో ఘటన

మెదక్‌, న్యూస్‌టుడే: కల్లు తాగి పలువురు అస్వస్థతకు గురైన ఘటన జిల్లా కేంద్రం మెదక్‌లో చోటుచేసుకుంది. పట్టణ పరిధి అవుసులపల్లిలోని ఓ కల్లు దుకాణంలో శుక్రవారం రాత్రి కల్లు తాగిన 30 మంది అస్వస్థతకు గురయ్యారు. వీరిలో పలువురికి నోరు వంకర తిరగ్గా మరికొందరు స్పృహ తప్పి పడిపోయారు. వారిని కుటుంబీకులు శనివారం మెదక్‌లోని ఓ ప్రైవేట్‌ ఆసుపత్రికి తరలించారు. బాధితుల ఆరోగ్యం నిలకడగా ఉందని ఆసుపత్రి వర్గాలు తెలిపాయి. కల్లు దుకాణ నిర్వాహకులు అందులో కలిపే పదార్థాల వల్లే అస్వస్థతకు గురైనట్లు బాధితులు తెలిపారు. అవుసులపల్లిలో పోలీసులు కట్టడి-ముట్టడి చేపట్టి తనిఖీలు చేయగా ఆ కల్లు దుకాణం నడిపే ఓ వ్యక్తి ఇంట్లో 12 కిలోల డైజోఫామ్‌ లభించింది. ఆ కల్లు దుకాణం నుంచి నమూనాలు సేకరించి ప్రయోగశాలకు పంపిస్తామని ఎక్సైజ్‌ సీఐ గోపాల్‌ చెప్పారు.