విద్యుదాఘాతంతో మహిళా రైతు మృతి

ఆరుగురు అధికారులపై కేసు నమోదు

కామేపల్లి, న్యూస్‌టుడే: పంట చేలో మిరపతోటకు నీరు కడుతుండగా ప్రమాదవశాత్తు విద్యుదాఘాతానికి గురై ఓ మహిళారైతు మరణించారు. ఈ విషాద ఘటన శుక్రవారం ఖమ్మం జిల్లా కామేపల్లి మండలం పింజరమడుగులో జరిగింది. గ్రామానికి చెందిన ఆలకుంట్ల రమాదేవి(45) మిరప తోటకు కాలువల ద్వారా నీరు అందిస్తున్నారు. పక్కనే ఉన్న విద్యుత్తు స్తంభం స్టే వైర్‌ను పట్టుకోగా విద్యుదాఘాతానికి గురై దుర్మరణం పాలయ్యారు.  బాధిత కుటుంబానికి న్యాయం చేయాలంటూ స్థానికులు ఆందోళన చేశారు. రూ.5 లక్షలు పరిహారం అందేలా చూస్తామని ఏఈ నారాయణ హామీ ఇచ్చారు. రమాదేవికి భర్త, కుమారుడు, కుమార్తె ఉన్నారు. మృతురాలి భర్త సత్యం ఫిర్యాదు మేరకు... ఆరుగురు విద్యుత్తుశాఖ అధికారులపై కేసు నమోదు చేసినట్లు పోలీసులు తెలిపారు.