అప్పుల బాధ భరించలేక యువరైతు బలవన్మరణం

హాలియా, న్యూస్‌టుడే: అప్పుల బాధ తాళలేక నల్గొండ జిల్లా అనుముల మండలం వీర్లగడ్డ తండాకు చెందిన ఓ యువ రైతు పురుగు మందు తాగి బలవన్మరణానికి పాల్పడ్డాడు. ఎస్సై శివకుమార్‌, గ్రామస్థుల వివరాల ప్రకారం... వీర్లగడ్డతండాకు చెందిన బాణోతు లక్ష్మణ్‌(22) డిగ్రీ పూర్తి చేశారు. తనకున్న ఎకరం పొలంతో పాటు మరో నాలుగు ఎకరాలు కౌలుకు తీసుకుని వరి సాగు చేశారు. పంటల సాగుకు గతంలో చేసిన అప్పులకు తోడు ఈ సారి కలిపి మొత్తం రూ.4 లక్షల వరకు అప్పులు అయ్యాయి. ఈ సీజన్‌లో అసలే అంతంతమాత్రం దిగుబడి రాగా.. వచ్చిన దిగుబడికీ మద్దతు ధర లభించలేదు. అప్పులు తీర్చలేనన్న మనస్తాపంతో మంగళవారం రాత్రి పురుగు మందు తాగారు. కుటుంబ సభ్యులు ఆసుపత్రికి తరలించగా  బుధవారం రాత్రి మృతి చెందారు.  కేసు నమోదు చేసుకుని దర్యాప్తు చేపట్టినట్లు పోలీసులు గురువారం తెలిపారు.