మంత్రి పువ్వాడ పేరిట నకిలీ మెయిల్స్‌..ఫిర్యాదు

నారాయణగూడ, న్యూస్‌టుడే: రాష్ట్ర రవాణాశాఖ మంత్రి పువ్వాడ అజయ్‌కుమార్‌ పంపించినట్లుగా టీఎస్‌ఆర్టీసీకి నకిలీ(ఫేక్‌) మెయిల్స్‌ వస్తున్నాయని ఆర్టీసీ చీఫ్‌ ట్రాఫిక్‌ మేనేజర్‌ సోమవారం హైదరాబాద్‌ సైబర్‌ క్రైమ్‌ ఠాణాలో ఫిర్యాదు చేశారు. ఏసీపీ కె.వి.ఎం.ప్రసాద్‌ కథనం ప్రకారం.. ఇటీవల tsrtc.gov.inకు bossdirector8@gmail.com నుంచి రాష్ట్ర రవాణా శాఖ మంత్రి పువ్వాడ అజయ్‌కుమార్‌ పంపించినట్లుగా మెయిల్స్‌ వచ్చాయి. మొదట వచ్చిన మెయిల్‌లో ‘అర్జెంట్‌గా కలవాలి’ అని ఏకవాక్య సందేశం ఉంది. ఆర్టీసీ చీఫ్‌ ట్రాఫిక్‌ మేనేజర్‌ కారణాన్ని తెలుసుకునే ప్రయత్నం చేయగా.. రూ.50 వేల విలువ చేసే అమెజాన్‌ గిఫ్ట్‌ కూపన్లు పంపించాలని మరో మెయిల్‌ వచ్చింది. దీంతో అనుమానించిన అధికారులు హైదరాబాద్‌ సైబర్‌ పోలీసులను ఆశ్రయించారు. ఇది నైజీరియన్‌ మోసగాళ్ల పని అయిఉండవచ్చని పోలీసులు తెలిపారు.