వన్యప్రాణుల కోసం అమర్చిన విద్యుత్తు తీగలు తగిలి తండ్రీకుమారుల దుర్మరణం

దమ్మపేట, న్యూస్‌టుడే: వేటకు వెళ్లి అదే జంతువుల కోసం అమర్చిన విద్యుత్‌ తీగలు తగలడంతో తండ్రీకొడుకులు మృత్యువాత పడ్డారు.  ఈ సంఘటన భద్రాద్రి కొత్తగూడెం జిల్లాలో చోటుచేసుకుంది. దమ్మపేట మండలం రంగువారిగూడేనికి చెందిన పొద్దుటూరి దానియేల్‌(45), కుమారుడు రాకేశ్‌(22), సోదరుడు విజయ్‌కుమార్‌లతో కలసి సోమవారం రాత్రి గ్రామ శివారులోని అటవీప్రాంతంలో వన్యప్రాణుల వేటకు వెళ్లారు. ఈ సమయంలో కొందరు వ్యక్తులు అటవీ ప్రాంతానికి ఆనుకుని ఉన్న మామిడి తోటలో జంతువుల కోసం విద్యుత్‌ తీగలను అమర్చారు. రాకేశ్‌ ఈ తీగల్ని తాకడంతో విద్యుదాఘాతానికి గురయ్యాడు. కుమారుడిని కాపాడుకోవాలనే తాపత్రయంతో దానియేల్‌ అతన్ని పట్టుకోవడంతో ఇద్దరూ అక్కడికక్కడే మృతిచెందారు. వారిని కాపాడాలనేయత్నంలో విజయ్‌కుమార్‌కు తీవ్ర గాయాలయ్యాయి.  మృతుడి భార్య సుజాత ఫిర్యాదుమేరకు కేసు దర్యాప్తు చేస్తున్నారు.