Cyber Crime:కూర్చుని సంపాదించమంటూ.. కొంప ముంచారు

రూ. లక్షల్లో నష్టపోయిన జనం

రామన్నపేట, న్యూస్‌టుడే: ‘దురాశ దుఃఖానికి చేటు’ అని తెలిసినా ఆన్‌లైన్‌ మోసాలకు నిత్యం ఎంతోమంది మోసపోతూనే ఉన్నారు. ‘మా యాప్‌లో నమోదు చేసుకోండి.. పెట్టుబడి పెట్టండి.. రోజూ ఊరికే కూర్చుని ఆదాయం పొందండి’ అంటూ ఆశ చూపడంతో యాదాద్రి భువనగిరి జిల్లా రామన్నపేట మండలంలోని పలువురు యువత ఓ బిజినెస్‌ యాప్‌లో డబ్బులుపెట్టి మోసపోయారు. కొన్ని నెలల క్రితం ఒక యాప్‌ వచ్చింది. ఇందులో రూ. 2,000 చెల్లించి సభ్యులుగా చేరితే రోజుకు 600, రూ.15,000  చెల్లించిన వారికి రోజుకు 2,900, రూ.25,000 చెల్లించిన వారికి రూ.5,000కు పైగా నగదు చొప్పున ఇస్తామని నిర్వాహకులు ప్రకటించడంతో చాలామంది సభ్యులుగా చేరారు. కొందరు వేలల్లో పెట్టుబడి పెట్టారు. రోజూ నగదు జమ అవుతుండటంతో ఒకరి నుంచి మరొకరికి విస్తృతంగా ప్రచారమైంది. రామన్నపేట, జనంపల్లి, లక్ష్మాపురం తదితర గ్రామాల్లో పెద్ద సంఖ్యలో యువకులు రూ.వేలల్లో పెట్టుబడి పెట్టారు. డిసెంబరు 28 నుంచి ఆ యాప్‌ మాయమైంది. మూడు రోజులుగా ఖాతాలో నగదు జమ కాకపోవటంతో ఈ విషయం వెలుగులోకి వచ్చింది. పలు గ్రామాల్లో వందలమంది ఈ యాప్‌లో సభ్యులుగా చేరినట్లు తెలుస్తోంది. జనంపల్లి గ్రామంలోనే రూ.20 లక్షలకు పైగా ఇందులో పెట్టుబడి పెట్టినట్లు తెలుస్తోంది. ఈ విషయంపై స్థానిక సీఐ చింతా మోతీరాంను వివరణ కోరగా, బాధితులు ఎవరైనా ఫిర్యాదు చేస్తే విచారణ జరుపుతామన్నారు.