AP News: యూబీఐకు రూ.228 కోట్ల కుచ్చుటోపీ.. కేసు నమోదు చేసిన సీబీఐ

యూబీఐ ఫిర్యాదుతో వెలుగులోకి..

ఈనాడు, విశాఖపట్నం: ‘యూనియన్‌ బ్యాంక్‌ ఆఫ్‌ ఇండియా’కు రూ.228.02 కోట్లకు కుచ్చుటోపీ పెట్టిన నిందితులపై సీబీఐ అధికారులు కేసు నమోదు చేశారు. ఆ వివరాలను గురువారం విశాఖలో మీడియాకు విడుదల చేశారు. ప్రకాశం జిల్లాకు చెందిన ఓ ప్రైవేటు సంస్థ, దాని ఛైర్మన్‌, ఐదుగురు డైరెక్టర్లు, మరో రెండు సంస్థలు, కొందరు ప్రభుత్వ అధికారులు, ఉద్యోగులు, కొందరు ప్రైవేటు వ్యక్తులపై కేసు నమోదు చేసినట్లు సీబీఐ వెల్లడించింది. ఓ ప్రైవేటు సంస్థ, దాని డైరెక్టర్లు కొందరితో కలసి కుట్రచేసి, తప్పుడు పత్రాలను బ్యాంకుకు సమర్పించి అక్రమ మార్గాల్లో రుణాలు పొందినట్లు విశాఖపట్నం యూబీఐ నుంచి తమకు ఫిర్యాదు అందిందని సీబీఐ అధికారులు తెలిపారు. ఆ రుణాలను దారి మళ్లించడంతో బ్యాంకుకు రూ.228.02 కోట్లు నష్టం కలిగిందని వివరించారు. కేసు దర్యాప్తులో భాగంగా ప్రకాశం జిల్లా సహా 8 చోట్ల సోదాలు నిర్వహించి, పలు కీలక పత్రాలను స్వాధీనం చేసుకున్నామని వెల్లడించారు.