పోలీసులకు సమాచారమిచ్చాడని చంపారు

సారా తయారీదారుల దారుణం

జీలుగుమిల్లి, న్యూస్‌టుడే: సారా తయారీదారుల దారుణానికి ఒక వ్యక్తి బలయ్యాడు. పోలీసులకు సమాచారం ఇస్తున్నాడనే కారణంతో అతన్ని అమానుషంగా చంపారు. ఈ సంఘటన పశ్చిమగోదావరి జిల్లా జీలుగుమిల్లి మండలం పూచికపాడులో గురువారం చోటు చేసుకోగా.. ఆలస్యంగా వెలుగులోకి వచ్చింది. పోలీసులు తెలిపిన వివరాల ప్రకారం.. గ్రామానికి చెందిన పి.వెంకట రామకుమార్‌(43) పంచాయతీ ట్యాంకు ఆపరేటర్‌గా పని చేస్తున్నారు. భార్య నుంచి 12 ఏళ్ల కిందట విడిపోయి ఒంటరిగా ఉంటున్నారు. గురువారం పోలీసులు సారా తయారీ కేంద్రంపై దాడిచేశారు. ఆ సమాచారం రామకుమార్‌ ఇచ్చాడని భావించిన అదే గ్రామానికి చెందిన సారా తయారీదారులైన తండ్రీకొడుకులు పరసా వీర్రాజు, మహేష్‌ కర్రలతో కొట్టారు. తీవ్రంగా గాయపడిన అతన్ని జంగారెడ్డిగూడెం ఆసుపత్రికి తరలించారు. చికిత్స పొందుతూ రామకుమార్‌ రాత్రి మృతి చెందాడు. మహేష్‌ను అదుపులోకి తీసుకోగా, వీర్రాజు పరారీలో ఉన్నట్లు పోలీసులు తెలిపారు.