కోతుల భయం.. తీసింది ప్రాణం!

భవనంపై నుంచి పడి మహిళ మృతి

ధర్మపురి, న్యూస్‌టుడే: కోతులు బెదిరించడంతో భవనం పైనుంచి పడి ఓ మహిళ దుర్మరణం పాలైన ఘటన జగిత్యాల జిల్లా ధర్మపురి పట్టణంలో శుక్రవారం ఉదయం చోటు చేసుకుంది. ధర్మపురి ఎస్సై కిరణ్‌కుమార్‌, బంధువుల కథనం ప్రకారం.. ధర్మపురికి చెందిన నారంభట్ల రాజేశ్వరి(52) హైదరాబాద్‌లోని ప్రైవేటు పాఠశాలలో చాలా ఏళ్లుగా తెలుగు ఉపాధ్యాయురాలిగా పనిచేస్తున్నారు. కుటుంబ సభ్యులతో సంక్రాంతి పండగను సంతోషంగా జరుపుకుందామని గురువారం సాయంత్రమే ఆమె ధర్మపురికి చేరుకున్నారు. శుక్రవారం ఉదయం నిర్మాణంలో ఉన్న తన సోదరుడి నూతన గృహాన్ని చూసేందుకు భవనం రెండో అంతస్తు మీదికి వెళ్లారు. అప్పటికే పైన ఉన్న కోతులు రాజేశ్వరిపైకి ఒక్కసారి దూసుకురావడంతో దాడి చేస్తాయనే భయంతో తప్పించుకునే క్రమంలో ప్రమాదవశాత్తు భవనంపై నుంచి కింద పడిపోయారు. తీవ్ర గాయాలతో అక్కడికక్కడే మృతి చెందారు. ఆమె భర్త కొన్నేళ్ల కిందటే మృతి చెందారు. మృతురాలికి ఇద్దరు కుమార్తెలు. మృతురాలి సోదరుడి ఫిర్యాదు మేరకు ఎస్సై సంఘటనా స్థలాన్ని పరిశీలించి, కేసు నమోదు చేశారు. పండగ పూట ధర్మపురిలో విషాదఛాయలు అలుముకున్నాయి.