అప్పుల బాధతో దంపతుల బలవన్మరణం

పామూరు, న్యూస్‌టుడే: ప్రకాశం జిల్లా పామూరు మండలం ఇనిమెర్ల గ్రామానికి చెందిన దంపతులు అప్పుల బాధతో పురుగుల మందు తాగి ఆత్మహత్య చేసుకున్న సంఘటన బుధవారం వెలుగుచూసింది. ఎస్సై సురేష్‌ తెలిపిన వివరాల ప్రకారం... వంటిపెంట లక్ష్మీనరసయ్య(57), ఆయన భార్య వెంకటలక్ష్మమ్మ(50) దంపతులు మంగళవారం మధ్యాహ్నం ఇంటి నుంచి బయలుదేరి పామూరు చేరుకున్నారు. అక్కడ పురుగుల మందు కొనుగోలు చేసి.. చిలకపాడు గ్రామ పొలాల్లోకి వెళ్లారు. అక్కడే పురుగు మందు తాగి బలవన్మరణానికి పాల్పడ్డారు. బుధవారం ఉదయం గొర్రెల కాపరి ఇచ్చిన సమాచారంతో విషయం వెలుగులోకి వచ్చిందని పోలీసులు తెలిపారు. కుటుంబ అవసరాల కోసం రూ.40 లక్షలకుపైగా అప్పు చేయడం, డబ్బులు ఇచ్చిన వారి నుంచి తీవ్ర ఒత్తిళ్లు వస్తుండటంతో ఆత్మహత్య చేసుకున్నారని పోలీసులు చెప్పారు. కుమారుడి ఫిర్యాదు మేరకు కేసు నమోదు చేసినట్లు ఎస్సై తెలిపారు.