కాడెద్దే ప్రాణం తీసింది

నాంపల్లి, న్యూస్‌టుడే: పంట సాగులో నిత్యం తనకు సహకరిస్తూ.. కంటికి రెప్పలా కాపాడుకుంటూ వస్తున్న కాడెద్దు ఆ అన్నదాత మృత్యువుకు కారణమైంది. ఎద్దు పొడవడంతో రైతు మృతి చెందిన విషాద ఘటన ఆదివారం ఉదయం నల్గొండ జిల్లా నాంపల్లి మండలం దామెరలో చోటు చేసుకుంది. స్థానికులు తెలిపిన వివరాల ప్రకారం.. గ్రామానికి చెందిన మండల బుగ్గయ్య(40) తనకున్న 11  ఎకరాల భూమిలో పత్తి సాగు చేస్తున్నారు. రోజు మాదిరిగా ఆదివారం ఉదయం వ్యవసాయ పొలంవద్ద ఉన్న పత్తిని తీసుకొచ్చేందుకు ఎడ్ల బండిపై బయలుదేరారు. పొలం వద్ద పశువులను మేతకు వదిలి పత్తిని బండిలో నింపుతున్న క్రమంలో అతడిని ఎద్దు పొడిచింది. దీంతో ఆయన అక్కడికక్కడే మృతి చెందారు. తండ్రి రాకపోవడంతో జాడ కోసం వెళ్లిన చిన్న కుమార్తె విషయం గమనించి స్థానికులకు సమాచారం అందించారు. మృతునికి భార్య, ఇద్దరు కుమార్తెలు ఉన్నారు. ఘటనపై ఆదివారం రాత్రి వరకు ఫిర్యాదు అందలేదని ఎస్సై కె.రజినీకర్‌ ‘న్యూస్‌టుడే’కు తెలిపారు.